MU DHEIDHINN A' PHÀIPEIR BHIG -
AN TIR, AN CANAN, 'SNA DAOINE

Chaidh Am Pàipear Beag a stèidheachadh ann an 1972 mar phàipear-naidheachd seachdaineach a bha air taobh clì poilitigs, ach leis a’ phrìomh amas, seirbheis ris a bheilear an dùil bho phàipear-naidheachd ionadail a thoirt dha na daoine air a bheil am pàipear a’ frithealadh.

’S dòcha gur e am mìneachadh as fheàrr air prìomhachasan a’ phàipeir an sluagh-ghairm Gàidhlig a tha air a shuaicheantas: “An Tìr, an Cànan ’s na Daoine”. ’S e th’ ann sluagh-ghairm a fhuaras bho Lìog Fearann na Gàidhealtachd a rinn, faisg air deireadh na 19mh linn, strì chudromach gus còraichean fearainn a ghleidheadh do chroitearan.

Tha cùis an fhearainn aig cridhe poilitigs a’ Phàipeir Bhig. Chun an latha an-diugh, agus uachdranachd phrìobhaideach fhathast ann, tha strì bhunaiteach an fhearainn cuideachd fhathast a’ leantainn agus tha seo air a chomharrachadh leis an uiread de sgeulachdan iomraiteach a chaidh aithris sa phàipear.

Airson a’ chiad uair fad iomadh deichead tha pàipear-naidheachd air a’ Ghàidhealtachd a tha gu gnìomhach a’ strì an aghaidh na dòigh mì-chiatach, ceàrr anns a bheilear a’ roinn seilbh air an fhearann, nì a tha fhathast bitheanta san sgìre, agus a tha a’ seasamh airson còraichean choimhearsnachdan agus daoine fa leth gu h-ionadail.

Tha Am Pàipear Beag cuideachd air a bhith ag iomairt airson cor na Gàidhlig, an dà chuid tro bhith toirt taic phoilitigeach agus tro bhith foillseachadh barrachd stuth sgrìobhte ann an Gàidhlig na pàipear-naidheachd sam bith eile. Thairis air a’ chiad 25 bliadhna, rinneadh adhartas mòr ann a bhith leasachadh cor a’ chànain, agus gu sònraichte, a thaobh solarachadh foghlaim.

Tràth sna 1970 an bha, mar eisimpleir, na h-ùghdarrasan ionadail, a bha aig an àm fo cheannas nan uachdaran, gu dubh an aghaidh aon fhacal de Ghàidhlig a bhith nochdadh air soidhnichean rathaid. A-nis thathar a’ gabhail ri soidhnichean dà-chànanach agus Gàidhlig a-mhàin mar rud cumanta, agus a rèir coltais chan eil iad a’ dèanamh cron do dhuine sam bith.

Tha Am Pàipear Beag air a bhith ag aithris air agus ag iomairt às leth sgeulachdan mòra a bha cudromach dhan àrainneachd. Uaireannan tha na h-iomairtean seo air a bhith soirbheachail. A thaobh cùisean eile, mar a bhith togail drochaid le cìsean àrda tro mhaoineachadh prìobhaideach chun an Eilein Sgitheanaich, chaidh beachdan a’ phàipeir – agus na coimhearsnachd ionadail – an cur an neo-shùim bho fhada às.

Tha sgioba sgrìobhadairean nan colbh cho math ri gin san dùthauch agus tha daonnan sgeulachdan naidheachd agus nas doimhne ann mu chùisean nach eil dìreach a-mhàin ionadail.

Gheibhear Am Pàipear Beag air feadh na h-Iar Ghàidhealtachd agus nan Eilean agus ann am bailtean air feadh na h-Alba, gach Dihaoine.